صاوي وداوي..!

كتب: شهاب الحامد

انا سمعي ضعيف وعادني لما اقرب من الشولة الدافور حق المطاعم ولا عد اسمع حاجة ، حتى اللي معي لما يسألني ايش تشتينا نطلب ما اسمعه بس افهمه لانه مافيش سؤال ثاني يفترض في هذا المكان الهادر الا عن الاكل ،لكن ما ادري ليش تعشينا في المطعم مع اني قلت له يشل لنا اي حاجة سفري .
الشيء المحير اكثر كيف يسمع ويفهم الطباخ صياح المباشرين المتواصل ويجهز كل الطلبات في وقت واحد وصوت الدافور على الآخر ؟

كل مطاعم الدنيا هدوء الا من اصوات موسيقى خافتة من ركن المطعم البعيد في بعض الدول ، اما عندنا تسمع ” كبدة لحمة سلطة فحسة برمة مندي مظبي مرقة سحاوق رطب رشوش دبل سنحل رز هز وز … حاضر ايوه طيب راعي واجي حاسب ،، كل هذا الداوي كوم وصوت سحباب الكراسي والامياز وقربعة الصحون والمطايب كوم ثاني.

الملفت ان الازعاج عندنا شيء طبيعي وجزء اصيل من حياتنا اليومية ، تروح مطعم ازعاج تنزل الشارع ازعاج تركب باص ازعاج سوق القات ازعاج في المدرسة ازعاج والمستشفى ازعاج تروح قاعة افراح صاوي وداوي تروح عند الحلاق ازعاج تصلح سيارتك ازعاج عند اصحاب الصيد ازعاج عند اصحاب الخضرة ازعاج ، تروح ارض اللواء ازعاج ، فيصل ازعاج ، الدقي ازعاج ، الكندرة والصحيفة والهنداوية ازعاج ، تروح الجبيهة ازعاج ، تروح بونا ازعاج ، شيفيلد ازعاج ، المهم وين ماراح ابويمن تحصل ازعاج حتى في الطائرة اليمنية وانته بين السماء والقاع ازعاج .
ولما تجلس وحدك ساكت في مكان وعادك ماقلت الحمد لله على الهدوء ، يجيك واحد يقول لك : خير ان شاء الله ، اليوم الدنيا هدوء ايش في ؟!